Australia, Melbourne ah vanleng khat Shopping Mall tungah kia, mi 5 si

Australia, Melbourne ah vanleng khat Shopping Mall tungah kia, mi 5 si

Australia gamsung aom Shopping Mall tung khatah vanleng khat kiasuk in mi 5 si cih 9News pan kiza hi. Tua vanleng pen vanlengneu “Charter Plane” in akizang te hi a, atung ah mi 5 atuang teng asi uh ahihi. Australia, Melbourne khuasung aom Direct Factory Outlet Shopping Center tungah kiasuk in, nakpi in puakkham a, meikhu vommeikai in agamlapi paninzong kigalmuh theihi.

Hih vanlengneu pen Beechcraft B200 King Air Aircraft kici a, King Island lam zuanin alengkhia ahihi. Essendon Airport panin alenkhiatzawh asawtlo in akia ahihi.

Victoria’s Police Minister Lisa Neville in agenkhiatna ah hih vanleng akiat laitak in atungah mi 5 tuang uh cihi. Tuni (Feb 21) zingsang 9am hunpawl in akia hi a, akiatna ahangpen genkhiatding hunnailo, ki theician nailo cihi.

Victoria Police te upmawhna ah Engine siatna “catastrophic engine failure” om ahih manin akia hiding ci uh a, ahi zongin akiatna munah meikuanggawp ahih manin athu akancianding Investigators tezong lutthei nailo uhhi. Australian Transport Safety Bureau te’n hihthu akancian dingin vanleng kiatna aphual ah Investigators mi 4 sawlkhiading uh kici hi.

Meiphelhding in Firefighters zong mi 60 val aphual ah tungpah uh a, meikatna leh vansia te velcianna nei uhhi.

News pawlkhat in agenna ah hih vanleng tungah atuangte pen King Island ah apaisawm uh hi a, tualai ah Golf kimawlding in apai uh kici hi.

Hih vanleng kiatna Direct Factory Outlet Shopping Center pen zingsang aki hongdinglian hi a, tua laitak in vanleng atungah akiasuk ahihi.

Tua Shopping Mall innpisung aom Spotlight Store Manager khat ii genna ah hih vanleng akiatsuk laitak in ko nasem mi 20 bang asungah ka om uh cihi. Amau sai ii vankoihna Warehouse nunglam sukha himahleh anasem te kuamah aliam omlo cihi. Ahi zongin Counselling bawlpihding in ki paipihpah cihi.

Vanleng akiatma in vanlenghawl Pilot in huhngetna “May-Day Call” nihvei neiman a, tuakhit phetin Shopping Mall tungah akiasuk ahihi.

Vanleng kiatna pen Essendon Airport tawh kinai mahmah a, hih Essendon Airport pen vanlengneu te zatdiak hizaw hi. Airservices Australia panin Spokeswoman khat ii genna ah hih vanleng kiatna hangin Melbourne Airport ah vanleng alengkhia leh atung te adingin bangmah nawngkaina piangsaklo hi ci’n genkhia hi. ZD Sawltak #zomidaily