April Fools’ Day: Tuni hong kigen khempeuh umpahpah ken!

April Fools’ Day: Tuni hong kigen khempeuh umpahpah ken!

Kumsim in April 01 nipen “April Fools’ Day” ci-in leitungbup phialin ciamteh a, khatlekhat ki khemin a up huai dekdekbang tammahmah hi. Ahi zongin April 01 ni in hongkigen thukhempeuh up pahpahding hikhinlo a, khuaktawh ngaihsun in kancianding kisam hi. April 01 ni in hongkikhem a, na upkhakleh hongkhem te akhial hilo a, khem athuak te ngaihsutzia kisapna hizawthei hi.

Abeisa in April Fools’ Day hongtunciang Kawlgam galkap mangpa Than Shwe si cih hidenpian a, tukumpen ama sihlam kiza khanai phalo hi. April Fools’ Day pen Public Holiday ahih zenzen lohhangin munkhempeuh ah nuam kisa mahmah a, ciamnuih leh akhelkhelzong tampi kimuthei zelhi.

Ahi zongin Zomi te’n “April Fools’ Day” pen ki tamzakluat nailohiam, ih thutheihna tawmlailua hiam, thukhat hongki genleh ki um kha pahpah hi.

2011 kum inzong Kawlgam ah “MoeNed-One Unicode” kici Myanmar Unicode kibawlding hi cih MoeMaKha Media Group te’n tangkokhia uh a, US$5 Million beiding ci uhhi. Tuazong “April Fools’ Day” ni in ciamnuih abawlna uh ahihi. Ahi zongin Zomi sungah Media Group pawlkhat bangin na um mahmah uh a, thuthak takpi saliang in Zolai bangtawh hongteikhia uh a, News in hong suahkhialiang uhhi. Athu paizia ngaihsunthei taktakleng uphuai hetlo hi.

Tukumzong “April Fools’ Day” ni in bangteng ciamnuih hongki luikhiazel tammaw?

YouTube te’n YouTube Video khempeuh lakah ahoihpenpen telkhiading ci’n tangko khia uhhi. Tuabang in Video ahoihpenpen atelkhiatding lakah abeisa kum 8 sungin YouTube ah aki Upload khempeuh lakpan ki telkhiading a, nangzong YouTube ah Video nakoihkhak aom zenzenleh kitelna ah ki helkhading cih ahihi.

“YouTube Announces The Nominees For Best Video (Day 1)” ci’n Video khat khahkhiading in ki gingging uh a, ahi zongin up huaithu hikhollo ahih manin, April Fool mah honghizel dinghi.

Hih April Fools’ Day pen Kawlgam ah aom ngeite’n ihtheihding ahi Kawlte pawi “Tazaungdaing” tawh kibat nakhat neileh kilawm kasa hi. Tazaungdaing cianginzong Niangtuisai te, Store saite Signboard (Signage) tepeuh khatlekhat kilaihsak cihbangin akhelkhel omthei hi. Sammetsai leh Niangtuisai khawng a Signboard akilaihsak sese ciangin hong nuihzak huaisimpian mahmah hi.

Company lianpipi te’nzong cimphawng cidinghiam nasia takin April Fools’ Day adingin gelkhiat pawlkhat neithei uhhi. Tukum 2011 kum April Fools’ Day ah aminthangpenpen Google Motion kicipian hi.

Google Motion pen ih Gmail te Webcam aomnakleh Keyboard kullo in, khuttawh Action lakleng kizangthei cihdankhat hi a, Technology lamah atuamtuam aomtheihtawh hong up huai simtham hi. Hih gmail.com/motion ah na vel dih un. Hih introducing-gmail-motion panzong kisimthei leh ki enthei dinghi.

Tuni hongkigen khempeuh umpahpah kenla, na upma in kancian masazaw phot in. Khem nathuak lohding kidawm in.

More: Zuau pen zuau hilo in a taktak ahi hi ~ Hau Za Cin

Tuamah bangin April Fools ci’n mi akhemkhem sese tezong bang acidan uh hidinghiam, ngaihsut huaihi. Mikhat khemzawh manin lungnopna ngah cihpen lungnopna amantaktak hikhollo khading hi. Zuau thugen pen zattangzang in neihkhak lohding thupizaw khading hi. April Fools azangnuam phadiak tepen mikhem a uk ngiat peuh ahih khakding uh, adang ni te ahzong hongkhemkhem tepeuh ahih khakding uh kidawm ni 🙂 ZD Sawltak #zomidaily 2011