Afghanistan ah Suicide Bomb puak, mi 27 kiim si

Afghanistan ah Suicide Bomb puak, mi 27 kiim si

Nov. 22, 2016: Afghan khuap Kabul sunga om Darul Aman kiim-ah Shia Muslimte pawi lian Ashura pawi kici ni 40 sunga kihel a tawpna kuan lam Arbaeen pawi kici Shia biakpiakna nei ten biakiin ah a neih lai un sihpih bomb puaksak khat mipi lakah va lut in, a bomb puaksak hi. Hih bomb puahna hangin mi 27 in sihna tuak in, mi tampi liamna tuak beh hi ci-in Kabul police chief Abdul Rahman Rahimi in gen a, misi kibehlap lai ding hi ci-in gen beh hi.

Ahih hangin UN statement in bel mi 32 a sih banah mi 50 val in liamna tuak a, hih banga gamtatna pen a lipkhaphuai mi tunga khualna nei lo-a gamtatna (atrocities) hi ci-in gen hi. Hih ngongtatna kuate gamtatna hiam cih a kipuk khia om nai lo hi.

Hih biakna pawi a kihel Nadir Ali in bomb a puah in leivui khu tawh kidim a, leivui hong then’ ciangin si leh nai leh si luang dim phengphang a, ka kawng liam ahih manin biakinn sung panin bok vak in ka kihem khia hi ci-in AFP news agencyte kiangah gen hi. President Ashraf Ghani in hih pen mihai leh minam haite (barbaric) gamtatna hi ci-in gen hi. Bomb puahna panin police ten liamna tuakte zoto inn ah puak uh hi.

Ashura pawi i cih pen Shia Muslimte adingin pawi thupi leh pawi lian mahmah khat hi a, Islam biakna phuankhiapa Prophet Muhammad’ tupa Imam Hussein 680 AD in a sih (galdona ah) ni phawkna dinga kibawl ahi hi. Arbadeen pawi pen Ashura pawi (ni 40) sung mah a kibawl hi a, Imam Hussein’ sihna dahpihna beina pawi ahi hi.

Ashura pawi kipat cil in zong sihpih bomb Afghan leilu lamah kipuaksak a, mi 14 in sihna na tuak khin zo hi. July kha in zong IS ten Shia Hazarate tamna Kabul khuapi ah sihpih bomb nih na puaksak uh a, mi 85 a sih banah mi 400 val in liamna na tuak hi. Source: NYT/WP/Al Jazeera And Agencies/ Thang Khan Lian