A 2 veina Zosuan Tuailai Khawmpi hong nai semsemta ~ Hau Za Cin

A 2 veina Zosuan Tuailai Khawmpi hong nai semsemta

Zomi khangno khempeuh adingin a angtanhuai hun nuam leh lungdam huai hong tung ding hita a, Zomi khempeuh adingin i tangthu ding khat hong kibehlap ding ahi hi. Khangno hih laitak hih bang hun nuam leh hun manpha tamveipi hong kiheikhia lo thei ahih manin a kihel ding khempeuh hampha kasa hi. Kei adingin ka khangno laiin hih bang hun nuam mu khalo ka hih manin hih bang hunpha a tuak khate hampha kasa a, ka eng a, a mailam ding uh limci kasa hi.

Bang hangin angtanhuai ci ka hiam cih leh i khangno hun sung sauvei hetlo a, i paal lai hun sauvei lo hi. Mikang paunak khat in, “When life is known half is gone” na ci hi. “Nuntakna bang hiam cih i theih ciangin a lang kizang khin thamta hi,” cihnopna hi. I nuntakna i theih tel taktak ciang i hun saupi kizangkhin a, laphuakpa laphuah bangin “lakik thei leng maw” cih ding tampi kimu zangzang hi. Tua ahih manin i paallai am in zangsiam ni. Na khangno hun, na pallai hun na kisikloh nadingin ZTK2 bek hilo hih bang hunpi te ah kihel zel ding a thupi ahi hi. Tua ahih manin hih bang hun pha sungah a kidiah kha mimal kim adingin a angtanhuai hunpha hi a ci ka hi hi. Nakpi takin lungdam huai a, nakpi takin am huai hi. Bang hang hiam cih leh Zomi khangno khua tuamtuam pan hih zaha tam kituahkhopna, kimuhkhopna ah khua tuamtuam pan ciamnuih leh thupiangte kiza tuah, kithei tuah ding ahih manin sangkah a pilna tuamtuam laibu sung pan, siate tung pan, kim leh pam pan a kingah, a kizak mah bang ding ahih manin a meet tampi om zaw lai hi.

Khoppi lah hong nai semsem, lungdamna lah tam semsem. Singapore ah Zomi 400 kim ki om dingin kituat hi. A om khempeuh in kihanciam in, sum leh pai, tha leh ngal, hun leh ngaihsutna tampi kibei hi. Thungetna tawh kipangin, hun manpha tampi eima na’ zong sem manlo in ZTK2 adingin kibei hi. A gimte gim mahmah a, anne manlo, ihmut cim manlo in a khuak uh zong hoihtak tawldam manlo phial ding hi. A zi a ta uh nusia in, a innkuan hun zat ding uh taisan in Zomi leh Zogam a khualna un tua a hun manphate piakhia uh hi.

Pan theihna lam tek ah kipang in pawlkhat thungetna tawh pang uh a, nisim in ZTK2 adingin thungen uh hi. A gim a tawlte nek ding an huansak, tui dawn ding pia cih bangin zong a hanciam om a, septheihna peuh ah kuamah kilomthawsak om hetlo hi. A thatang, a hun uh a piak bek uh hunsa lo in a neihsa uh sum leh pai piakhia in kihel vanvan uh hi. A neihval uh hi hetlo hi. A nei penpente zong hi hetlo hi. A sum tam thalawh cih bang zong hituanlo hi. Gam leh nam adingin a pang, a sem uh hilel hi. Tuni ciangciang ah Singapore pan ZTK2 adingin a piasa mimal min 88 bang phata hi ciin kiza hi. Mihing 100 zong a phalo in Lai Siangtho sunga meigongnu sumpi khiat bangin eima lungsim kizawh dan tek a ki khiat ciangin Zogam ah Zomi khangno a kihel zahzah adingin thu manpha leh limci kikupkhopna hun, tukhawm a holimna hun a kineithei ding suak a, nakpi takin lungdam huai hi ciin ka ciamteh hi.

Singapore ah om Zomi teng bek in Zomi leh Zogam a vei, a khual hi zenzenlo hi. Zomi khangnote mailam ding a deihsak leh tha a pia nuam gam tampi ah Topa in hong puak kawikawi hi. USA pan, Australia pan, Japan pan, New Zealand pan, Malaysia pan, Kawlgam pan, Norway pan, cih bangin sum hong kikhak vanvan hi. Hong khak khin zong om a, hong khak lai ding zong lampi tungah a banglai zong om hi. Hih banga sum leh pai hong khak vanvante in a neihval uh hong khak hi tuan peuhmah in ka um kei hi. A itna uh lungtang pan a phal taka hong piakkhiat uh hong khak uh hidingin ka um hi.

1. Mimal in niangtui hong vak ding uh: Khoppi sim khempeuh in gilkial in a om loh na ding un ciin Itna Banzal leh Pa Do Kap Pau te in a tuam vilvel in mipi niangtui dawnna ding hong pia khia uh hi. Niangtui leh moh limci tak a ding hong piakhia amaute i biak Pasian in a piakkhiatna uh sanga a zah tampi in thupha tawh na phungvuh kikta hen. Mimal in amau ip sung sawk ngiatngiat a hih banga hong khak veuveute ZTK2 makaite in thupisa in Zomi bup in zong thupi sa dingin ka lamen uh hi. Zomi hih hong angtangsak vanvan uh.

2. Japan om Zomi te in Niangtui hong vak ding uh: Tua mah bangin Japan a om Zomi te in zong amau mimal a sum kidong khawm in Niangtui khatvei hawpna ding ciin Ks. 200,000 direct in Tedim ah na khak nung ci uh a, nakpi takin kilungdam hi. Japan pen, kei zong ka paina sa hi a, a nuntakna uh ka theih pawlkhat om hi. Sum leh pai neihval, lamval hi hetlo ding cih ka tel sitset hi. Itna pan hong luangkhia deihsakna kipia hi cih ka tel hi, keima mimal in zong. Tua ahih manin Zomi khempeuh in Japan a om Zomi te lungsim pen a khangto gama omte lungsim nei uh hi cih hong telsak kasa a zahtak piaktak namte hi ciin ka ciamteh hi. Japan a om Zomite in a kumsim “Khuado Sakholh” a neih uh zong etteh huai mahmah hi. Amau pen Ngaih Anglai gam pan ahih uh mah bangin Ngaih Banzal hong suan uh hi ciin zong kiciamtehsak theih hi.

3. Sun ann ding aksa taangcim hong huan ding uh: Zomi khangnote thu leh la kikum a sun thapai tu ding cih a ngaihsut uh ciangin amau nupa ipsung sawk in Pa Kai Lian Khup leh a zi Siamah Nuam Khan Dim in sun ann aksa taangciim hong vak ding uh hi. Pa Khup pen Zomi te ulian masa Colonel Pu Khen Za Mung upa tapa hi a, milian masa innkuan pan khangkhia cih mah mipite khualna leh deihsakna, itna lian mahmah hi cih kimu hi.

4. Sial tawh mipi hong vak ding uh: Tua bek hilo, Pa Pau Khan Khup te innkuan in khoppi sim khempeuh mipi ankuang hong umpih nuam ung ciin Zomi te in gan khempeuh lak pan gan thupi leh min nei a i koih uh Sial hong gawh ding uh ci hi. Zomi leh Zogam hong itna uh kam tawh gengen loh in zong a piakkhiatna uh pan kilang khin hi ciin ka ciamteh a, ka lungdamna ka gensiam kei hi. Zosuan Tuailai Khawmpi 2015 a sim ding khempeuh hampha kasa a, a piakhia innkuante lah ngaihsun siam kasa hi. Topa Pasian in a piakkhiatna uh sanga a tamzaw a zah tampi in thupha tawh hong phungvuh kik ta hen.

Hihte khempeuh ka ngaihsut ciangin laphuakpa in:

• It lehang a mel a hoih, mudah leng a mel a sia
• Phal lehang piak ding om a, phal kei leng piak ding omlo
• Pai nuam leng nai cik hi a, ut kei leng lah gamlapi
• Ki itna in khum pen a, muhdahna a khat in kha

a cih hong phawksak hi.

Itna, deihsakna tawh phal taka piate khempeuh tungah kam tawh a kigen zolo lungsim tawnga lungdamna om hi cih hong ciaptehsak un. Na piakna, na gimna, na hun beina, na tha beina khempeuh a zah tampi in thupha tawh tung Pasian eite minam a hong bawlpa in hong phungvuh kikta hen.

Zomite Pasian tungah lungdam ka ko hi.

Hau Za Cin
Phuitong Liim