1998 kum a khatveina Pi leh Pu Bible Camp, Tedim ~ Khup Khan Thang

1998 kum a khatveina Pi leh Pu Bible Camp, Tedim ~ Khup Khan Thang

1998 kum December kha ni 15 pan 19 ni dong, Tedim khua sungah, a khankum, kum 70 acing khin pilehpu te, Cope Memorial Baptist Church ah kikai khawm in, Laisiangtho sinna kinei pih hi. Hih “Pi leh Pu Bible Camp” pen, Tedim khua a kiphut Tedim Christian Fellowship (TCF) in asep abawl, avaihawm pansan la in, sum leh paai bei khempeuh Khup Khan Thang & Nu Ciin Man Niang te nupaa in sii hi. CMBC pawlpi in innteek sem hi.

December kha 15 ni Breakfast zingniangtui leh pongmoh lap ding in, CMBC biakinn kiimnai aom pilehpu teng hong kikai khawm uhhi. A puanlom dinguh atu ata ciat in hong puakpah uhhi. Leitawhtan, Leiluum, Lawibual aa omte leh Sakollam lam aa omte mawtaw Hilux tawh kidawn kawikawi hi. Myoma sungah om damlo hong paizolo te zong mawtaw tawh kidawn hi. Hih vaihawmna thu azak ciangin, Tonsim lam aa khualzin aom, Kapteel te Pu Tun Za Go in hong delh vingveng aa hong kihel thei hi. RCM, Baptist, AG, EBC, UPC, ZBA, Methodist, Presbyterian, pilehpu te zong hongpai kiim in, avek in sawmkua val, zakhat dektak pha hi.

Pilehpu te hong tung maasa sa, TCF vaaimuak te’n niangtui/coffee leh moh tawh nadawn pah hi. A min uh leh asuah kum uh a kikhupsak kawmin, asii Blood Pressure (BP) kiteh sak pah in, a nektheihloh an leh meh, leh a kihuatpih zatui zahaa te zong kidongpah hi. Amau tawh agiak khawmding Zato Sayama 2 zong hong kipiakhia (Volunteer) uh hi. Zatui zaha zong kiging sa-in kikem sak pah hi.

Breakfast: niangtui, coffee, bawngnawi, pongmoh, mohphengkan, aktui huan, cih bang leh Lunch/Dinner: aksa, bawngsa, voksa; zan ihmut maa niangtui/coffee tawh vak in,  nipi khat sung siset CMBC Biakinn sungah nupi teng kigiak sak aa, papi teng Cope Pre-School inn ah kigiak sak hi. Phalbi laitak ahih man’ in, a lupna kikal uh-ah Meihol meibung tampi zanthapai ki cihsak hi. Zanzun nawnte a’ding zunbel zong kileisak lai hi.

Breakfast nek khit ciangin, tavuan nei sia teteng in, Ziing lam kikhopna leh thusinna neipih hi. Tua khitteh lunch kine hi. Sunhun nai 1 sung kitawlnga sak hi. Nitaklam kikhop thusinna kineipih leuleu aa, aman’ uhteh dinner ne hi. Tua khitteh a giahphual uh ah “Vesper Service” kibawlpih in, tea/coffee dawnsak in kilumsak hi. Nitak simin sayama te’n zatui zahaa vahawm uhhi.

“Pi leh Pu Bible Camp” a kizawh ni-in, Khuasung ulian makai pawl khat, Khup Khan Thangte tanau pawlkhat tawh Special Grand Dinner kibawlsak hi. Zanciang camp fire kinei aa, Zola awi, Khup Khan Thang te nupa Zola a’phuah te uh sut in awi aa kilam hi. Lamgui zong kikai hi. Tua khit ciang Lucky Draw zong kibawl sakhi.  Azing ciang breakfast nek khit ciangin kikhen uhhi.

Hih “PI LEH PU BIBLE CAMP”  bawl ding ka ngaihsut khak dihdihna in; – Sakkara Island ah  Du Pont Adi-pure Plant 2nd Fluid Bed Dryer Upgrading & Semi Refinery Crystallizer  Plant Project ah Project Engineer ka sep ciangin afternoon Shift  3.00-11.00PM kasem hi. Tuipi tungah minute 30 bang Ferry kituang hi. Nitak khat nasepna pan kaciah lam-uh, zankim laitak, tuipi tungah huihpi guahpi katuak-uh aa, ka ferry banguh tuihual tung tumzel dawkzel bang liangin hong om hi.

Kalaisai a kisi ziau thei ding hiveh e cih kalungsim sungah hong suak hi. Simawk leng, kasum lawhlawh teng bang ding?  Gamdangah meh lim nono, an lim nono ka nek hang… Kakhuapih katuipih te’n tuisik haikhat zong hong noptuampih, hong nekpih khak cih lah hilo aa, bang a khiatna om? cih bang ka ngaihsun kha hi, Ci adam leh khatvei peuhmah Tedim ah ciahin PilehPu teng peuhmah an nekpih ding cihkhat kalung sungah hong suak keeimawk hi.

1998 kum October kha-in, Singapore aom, US Embassy ah America gam zin theih nading “Visa” ka siauh uh leh kanupa un ka ngahpah uhhi. Ko zong Singapore nusia in USA gamah kikhuasak ding khawng kalung tung zaw uh aa, ka Singapore Permanent Resident (PR) zong apkik (Renounce) uh hi. Singapore for good, in ka nusia pah uhhi. USA pai hunding kha 3 sung “Visa” ka ngah sung uh Kawlgam ciah in hun saupi Tedim ah kazangzaw uhhi. Tua hun sungin hih a khatveina “Pi leh Pu Bible Camp” zong kabawl pah uhhi.

“Visa” kha 3 teng Kawlgam ah zangh zaw in, a’ kha 3 cin’ nang’ ni khat sap January 06, 1999; 3:30PM San Francisco khua katung uhhi. Nisuahna lam pan nitumna lam zuan hi kei le ung, Kawlgam pan kadin khiat hun uhtawh ka “Visa” ngahhun kha 3 beima in USA atung man’lo ding ka hi uhhi. Azingciang in San Francisco pan ding khia leuleu in, Wasington D.C ka nitak tu’n uhhi. Pa Ngo Cin Thawng te inn ah kha 3 valtak man’ ngenlo in zin hong do ahih man’ in, lungdamna hih lai tawh kako hi.

Hih “Pi leh Pu Bible Camp” kibawl a kipan Zomite sungah piteekte puteekte ih-it, ih-khoi, ih-kepding, ahilam khanlawhna thakkhat hong piang hi. Biakinn pawlkhat in, kum 60 tungsiah pilehpu te, pawlkhat in piguai puguai te letsong piakna, pahtawina piakna hong phuankhia in, kumsim in zom tawntung uhhi.

Video: Khatveina Pi leh Pu Bible Camp, CMBC Tedim (Part I) December 1998

Khup Khan Thang te nupa Zola a kiphuah teng:

Mr. Levi Gin Za Cin, B.G.M., W.K.H., H.G.P. phuah:

Hih Zola teng pen Zolaphei hi.

1. Thangvan saang pan, Sianmang in, maimit hong suan, Dimtui vangkhua, phualgia bang hong zuuntah e; Khup Khan Thang leh, Ciin Man Niang, tui bang agawm, Sanggah mom te, zua pa leh, tun nu hi e.

2. Tun leh zua tan, momno te, gil bang giah nang’Sung-inn sau nuam Dimtui lai, ah khuam sak e; Tum bang a guai, Pu von leh Pi von te zong, Mu bang ngai in, Sianmang tual, ah hong khawm e.

3. Sesum ah lamh, li tui bang khang semsem hen, Dimtui vang khua heisa bang, pal sak hen aw;Kumsawt phui-gua, bang hing in, kui tung hen, Sinthu akhual, Lawi bang in, thang den hen aw.

4. Hi bang sinthu, cianphung bang, k idem ciat ni,Zogam tulta, sunni bang taang sak ni e; Sianmang lo in, simlei sinthu kimlo a, Sianmang minlawh pak bang in, tawiciat ni e.

Pu Vung Dal Phuah:

1. a. Dimtui tanggual zatam lai a, hawmsiam a gual sing aw ee; b. Hawm a siam aw, Thangno aw, Niang aw, vondeih tawisak nuam sing ee.

2. a. Nunkhum laina, albang natah, Sanggah te Zua pa hi cia; b. Sian in nibang hong awi ding a, nakhan suangsawn ding hi cia.

3. a. Langlam dinga, lung atup, Manlong zuahuang akhia cia; b. Zata’n deih a,pal alawhla, naduang a kibaang khin e.

4. a. Dimtui ngalliam, vailun, dawnghawng, Cin Do Kham leh Khup Khan Thang hi ee; b. Langlam philtang bang hongpawi ee, Dimtuita lungtai sak ee.

5. a. Tulgahluai Phialva bawm e, nahawmtel zata’n bawm ee; b. Tuun gual, Zua gual albang nongtah, nakhan kumkhua sawt hen aw.

Pu Dai Nang Phuah:

1. a. Kawi tawh holung natup aa sungtui nawnglawh Sian in nibang awi hen aw; b. Nakhan kumkhua hongsawt hen la, langlam libang cing hen aw.

2. a. Nahawm siam no, Dimtui lai ah Gamgua bang kui tung hen aw; b. Kumsawt tu bang ih cincin ding, ning leh aisa niang hang ee.

3. a. Von Thang hawmsiam heina peuh ah, tatna thal zanghen aw; tuizum tual ah vaimang munah navaang nibang taang hen aw; b. Navaang nibang tang hen aw, kumsawt guabang hing ve aw.

Bo. Pu Zel Khaw Pau Phuah:

1. a. Khangciang vaimang tongdot luang a, Khup Khan Thang leh Ciin Man Niang, No hawm haibang ngak un gee;    b. Sianmang Zeisu tongdam sanna, tumbang guai pakbang na tawi tulmawh hen aw, Hiangsing bang zau lai hen aw.

Pu Gin Dal Phuah: Manlong aa phuah la

1. a. Tun tawi siam a, von Thang langlam minthang Manlong phualva giabang ee; b. Phamsa von Mang zuang hongtho aw, natuai langlam pakbang tawi ni ee.

Pu Cin Za Kap Phuah:

1. a. Dimtui vangkhua tun leh zua teng, hambang huaisiam Sian in awi hen aw; b. Kavon momno phualva dung zil, setang nuhnel kai ka dawm cimlo dawndawn nuam in ee.

Pu Tun Za Go (Kapteel) Phuah:

1. a. Kapu La Cin Khup aw e, tembang nadeih Don Khaw Cing tawh vontawi tengtawh, natu sawntawh Sianmang aw, kumsawt guabang hingsak aw, Sianzamang aw ee; b. Pupa lamloh pheiphung mawtaw, tuanglam tungah vabang alen zang’sak ee.

2. a. Dimtui navangkhua lai ah e, Khup Khan Thang aw nakawi lia nu Ciin Man Niang Tawh Humpi Nelkai bang athang aw ee. b. Zing nazinna, namcih vangkhua sesum minthang kawi lia nu tawh tun mun a Tuangtung aw.

3. a. Cik a nekloh, sungtui kalawh lawm gual aw, lim nalawm lawm lim nalawm lawm kasa ee; b. Damna in pha e, damna in pha e, tunmun ah hilnuam ing e, ka Pasian aw e,  Sian zamang aw ee.

Pu Tun Khaw Lian Phuah:

1. a. Sianmang tongciam sawm a khat pan meigong tagah en lecin, Sianmang sinthu zo leh kilawm zoleh kilawm ee; b. Sianmang sinthu malobang hialte, tun leh zua teeksia tengtawh, azawh minthang azawh minthang ee.

2. a. Singta vontawi ami zatamte lakah, lunglai gel Sianmang aw lawm Thang aw; b. Sianmang sinthu paaibang poma, hambang huaisiam nang aw lawm Thang, nang aw lawm Thang aw.

3. a. Sak a lengte, khang a lengte, vonthang vabang natuanna melin muung’ ee; b. Lamlam thulsiat sangmang gel citkaih taangzam ngingei aw lawm Thang.

Pi Zen Ngaih Cing Phuah: Bible Camp pan kitelna Teci Pan La

1. a. Tung Pasian pawh hawmsiam sang e, vonkhat tawi in zata laitan ee; b. Nang nasaang maw ih To Zeisu, kei kapham leh thangvan munmuang e, thangvan munmuang e.

2. a. Sesum minthnag paallai lo ding zata tongdot vontawi tuai Thang kilawm pen e, Thang kilawm pen ee; b. Zatam tongdot vontawi tuai Thang mah kilawm pen e, sung nek laikuang zata taipen ee.

Hih Laphuakte khat nangawn a nungta nawn kei uhhi. Tu dongciang kei theih ah Pu Dal Za Khup bek nungta lai hi. Pite lam pan khat leh nih bang nungta lai thei inteh. Hong khua_ngaih huai veve mawk ei!Video na et nop leh Youtube “Khatveina Pi leh Pu Bible Camp, CMBC Tedim, (Part I, II, III) December 1998” ah ki en thei hi.

Khupkhan Thang Taithul, Norman, Oklahoma, U.S.A. October 25, 2017