WA gamsung Tapidaw te kibawl siatna (tunai thupiang)

WA gamsung Tapidaw te kibawl siatna (tunai thupiang)

Kawlpi pan dinkhiatni: 30th Oct, 2018 5/11/2018
Kawlpi tunkikni:  3rd  Nov, 2018

Thu matai: WA State(government) is part of Shan State, Myanmar.  But they govern themselves. Only in WA state more than 700000 people are living. Animism is strong but at the same tiem Christianity also deeply rooted among them. Baptist is the leading Christian Mission WA State.

WA gam pen Shan state ni suahna lam ah om in Kawlgam uk sung mah ahi hi. Ahih hangin a mau leh amau ki-uktheihna thuneihna nei uh hi. WA gam sung bekbek ah mi 700000 kim teng uh hi. Khanglui biakna hat a, Khristian biakna in zong zungkha simsim khin hi. Tuiphum pawlpi pen biakna kipawlna lianpen ahi hi.

A Ki-uk Dan uh

WA gam pen Communist gam cileng kikhial kei in teh. Kawlgam gi sungah a om uh hangin Sen kumpi in amau tungah thunei zaw uh hi.

How the Persecution begin (This is What I learned from them (interview) on one single Night)
Bawlsiatna kipatdan(WA ulian Khristian innkuan khat kiangah Pangsang a kici WA khuapi sungah kagiahnate tawh kihona)

Ahang khatna: 2013 kum khawng khat a kipan, Taiwan gam pan in Khristiante Sen gam tawnin hong lut uh a, (Pentecostal upna nei gammial na sem tam leh kilawm hi).  Gammial na sem 100 kim bang lut uh a, Education tawh Approach bawl uh in, WA gam Educaion minister phalna tawh Sanginnte lam uh in, pilna hilh uh a, tua tungtawnin gupna thu en uh in, thu um mi khang to mahmah hi.  Nipi sim phial ing Pawlpi khang hi. Tua thu theih uh ciangin Mainland Chinese Government in WA gam uliante pressure pia uh a, “Taiwan Missionaryte Nitumna lam gamte in huh uh hi, tua bek thamlo in, hihte hong tam le uh thu hong nei ding uh a, no a dingin haksa dingin a manlangin khaktanna khat nei un,” ci uh hi.

Ahang nihna: Maiphian khua ah Tuiphum pastor a sem Pastor Aih Khon pawlpi ah thu um innkuan a lut thak om a, innphiatna ah, milimbiakna vanzatte mei tawh hawl, video zaih, online ah post a, thuumlote in a muh uh ciangin heh mahmah uh hi.

Ahang thumna: WA gam khuapi Pangsang ah, Tuiphum Pawlpi lianpen ah Pastor a sem, Pastor SaiSein sunghpa si hi. A kivui dingte, a innkuanpih leh a pawlpi in Christian biakna tawh vui nuam uh hi. Ahih hangin a tanaute un dawibiakna ngeina tawh vui nuam uh hi. Ahih hangin Pawlpi in sihvuina makaih in kal suan toto uh a, tua sung mahin Pastor Saisein kiman ta hi.

Behlapna:

Khatna: Hih buaina lianpi a om ma in, Kachin gampan in AG missionary te Lasho pan in Pentecostal upna nei gammial na semte pai uh hi.  Ahih hangin a om sa pawlpite in WA kumpi tungah khia zel uh a, thong kiazel, kikhah zel cih thu zong om hi. Tua bang gammial na semte tungtawnin na lamdang piang leh a kikhel zong om ci hi.
Nihna ah: Lasho khuapi ah, WA Tuiphum pawlpi lianpi khat om ci hi. Tua pawlpi pen kithutuaklo uh a, khenpi 3 in kikhen hi. Ahih hangin Biakinn khat zanghkhawm uh hi. Tua ahih manin nipi khatin Senior Pastor thum in Biakinn khat sungah a hun tuamtekin biakpiakna neih pih uh hi. Hih pawlpi panin WA gam ah gospel a pai uh ciangin, a mau pawllote, a aupawlte cih bangin thutampi om a, WA gam Tuiphumte in no buaina ko kiang hong tun uh teh hoihkei ci zelzel uh, ci hi. Cih nopna ah Lasho Pawlpi buaina in WA gam Tuiphum pawlpi sung lawh a cinuam zong amau lakah om cih na hi.

Bawlsiat kipanta: A diakdiakin a tunga thu thumte hangin WA(communist) gam ah September 9, 2018 a kkipanin bawlsiatna kipan ta hi. Pastor leh makai a kigawmin 200 val kiman ci hi.
Biakinn kikhak/ Kisusia: WA gam sung bupah Biakinn 50val kikhak in 3 kisusia a, Pastor inn zong kisusia hi.

Lai Siangtho

Biakinn pan hitaleh, Inn pan hita leh, thuum mimalte tung pan ahi zongin Lai Siangtho bu a vekin laksak uh a, mei tawh hawltum bang khin uh hi. Ka inntek pa in WA gam ah Lai Siangtho bu ko-a bek om in teh hong ci hi.
Sangnaupang 41: WA gam ah Lai Siangtho sangnaupang 41te zong kiman a, zawhthawh thutawh  galkap lutsak uh hi.

Thukham tawh suaktasak

WA gam thuneite in khahkhiat kik ding thu a gen ciangin, anuai a bangin thukham bawl uh a, ka thukim hi ci in, letmat a thuhte suakta sak uh hi.

• 1. Jesu honpa leh Topa dingin ka um nawn kei hi.
• 2. Jesu Khris thu ka gen nawn kei ding hi
• 3. Biakinn ah Pasian ka bia nawn kei ding hi. Inn ah Pasian kabia nawn kei ding hi.
• 4. Lai Siangtho ka sim nawn kei ding hi.
• 5. A zenzenin a tungate khat peuhpeuh ka sep leh  Yuan(seensum) 2000000/- ka liau ding a, thong kum 5 ka kia ding hi.

Letmat a thuh peuhmah in suahtakna ngah uh hi.  Pastor khat bangin bawibia kik khin ci zen hi.

Upna ah a kip Pastor 8 leh upa 1

A tunga kiciamna lai thongkiate mai ah a sim khit uh ciangin, letmat thuh sak uh a, mi 200 in letmat thuh uh a, suakta sak pah uh hi. A hih hangin a lungdam huai leh lungsim hong sukha mahmah thu khat ah, Pastor 8 leh upa

1 te in kumpi nu Esther bangin, “Ka sih leh ka sih ka gumpa nusia dingin letmat ka thuh kei ding hi” ci uh a, tu ni dongin tua 9 te thong ah om uh hi.  Tuate in a nuai a te ahi uh hi.

• 1. Pastor SaiSean, Pangsang Myo
• 2. Pastor SamMaung, Chichaungkuh Community, Pangsang Myo
• 3. Pastor Aih Cuum, Maizun Village
• 4. Daw EIh Taung: Maizun  Village.
• 5. Deacon: Aih Chun
• 6. Pastor Et Phu: Panku Village(wife of Number 7)
• 7. Pastor Aih Pang:Panku Village(Husband of number 6) Ta no thum nusia uh hi. Pasal no nih leh numei no khat ahi hi. Aminte: Tg. Nge Mon kum 5. Tg. Nyi Poun, kum 4, lia, Nai Nap kum 3. Pastor  Aih Choon, Maipian Village.
• 8. Pastor Sam Pian: Maipauh Village

Thungetcialna

• 1. Pastor 8 leh upa 1 letmat thuh kullo, cidamin hong suahtak na ding uh. A zite uh, a tate uh thungetsak ni.
• 2. A kikhakcip biakinnte a kihon kikna ding leh a kisusia biakinnte a kilam kik na ding.
• 3. WA gam ah biakna ah suahtakna a hong om kik na ding.

Agam thu om zia

WA mi namte pen nidang gamgi kikhen ma ci in hong kigen in, tua lai in, Maesai, lam ah teng uh a, Thai te tawh kido den uh a, zo den uh hi.

Tua ciangin Thai nungak khat WA makai pa zi dingin kipum piak a, thu a kan ciangin, WA makai pa in Sai longal lo a neihloh lam mukhia hi. Tua khit teh Sai tawh galdo uh a, WA te in lel uh hi. Kawlgam Cheiadong lamah hong taito uh a, kum 100 bang teng uh hi. Tua mun ah WA makai pa in, WA zi nei, Shane zi nei, Shane zi tawh a tate in sim mawh uh a hih manin, WA teng tulaitak a, WA gam icihna ah tai uh hi, ci hi.  Tua lai in, WA gam pen Shane gam sungah omlo ci hi. Pinlone treaty hun hong tun teh Bu Kyoke Aungsan in, WA panin zong tangmi khat sam hi. Tua WA tangmi pa Shane gam ah Shane makaipa tawh kimu in, numei tawh zin do in, nuam sa ahih manin, kei hong pai nawnkei ning hilaiah na om ning, WA gam nang thuthu hi hen ci-a, tua a kipan WA gam pen Shane gam sungah om hi, ci in hong gen uh hi.

Ref:

• Hih ka lai at pen, WAte ulian khat tawh ka kihona hi.
• Hih ka lai at a thanem na ah, Reference omlo hi.
• Nileh Kha, kum cihte zong omlo hi.
• Min zong omlo hi.
• Tua ahih manin, a thupiang lungngai in, thungetsak ciatni cih ka hong thum hi.

David Khen
Myanmar