Tulai Nepal zinling’ in Zomite zong hong nawkkha hi

Tulai Nepal zinling’ in Zomite zong hong nawkkha hi

Tulai Leitungbup thu kizakna thupi tuamtuam ah a thang vangvang ni 25/04/15 nai 11:56am kim pawl a, Nepal Zinling na hang in Lamka lam aom I sanggamte khat zong si cih thu Tongsan panin I zakha, I simkhatek dingin I ki lamen hi. Tua bek hilo in Zomi gambelte zong nawkkha in Pasian hong kepsakna hangin aliam abai omlianglo cih thu kiza ahih manin I lungdampih hi.

Nepal gam pen Zogam mah bangin min tuamtuam minam dang te’n lawhna or sapna nei uha, gamdang pawlkhat te’n Tower Mountain, Ancient Monuments ci uh hi. Leitungah mualsang pen Everest mual omna gam zong ahi hi. 2010 kumin ka vahawh khangei a, Zogam mah bangin mualtung hi-in khuahun vot hiuhiau hi.

Zinling a khauhna pen 7.8 magnitude kim bang hi-a, mi 6.6 million val bang nawkkha a, mi tul tampi si uh hi. Tulai tak mi 3 million kim bangin nek le dawn haksatna tuak uha, 2.8 million kim bangin omna kician neilo uh hi. Zomi gam bel a, omte’n zong sawlpangbuk dan bawl uha, tua mun ah ki busa uh hih tuak hi.

Silh le ten, nek le dawn, zatui, zaha aki pan akisam tam mahmah uha, gam tuamtuam panin zong huhna pia uh hi. US in 10 millions, Europe Union in 3.3 millions, leh Australia kumpipa in zong 5 million kim bang piakding in kamciam cih thu kiza hi. Thungetna a kipan sum le pai nikten puansilh ahuh zozo in huhciat ni.

Khaibawi
Source: www.abc.net.au/btn