Nangpang kum 8 a pha khat in Pasian a muh dan

– Pasian nasep a thupi penpen khat in mihing bawlna ahihi. Pasian a sisa mihingte mun a luah dingin mihing tampi bawl hi.

– Pasian in a picinghsa in kuamah bawl lo hi. Bang hang hiam cileh naungek bawl pen baihsa zaw cihna hi. Tua naungekte pen a pantah ding nulehpa guan pah hi. Pasian in a hun mawk bei sak nuam lo cihna hi.

– A nihna ah mihingte thungetna ngaihsak ding pen Pasian nasep lian pen ahihi. Mi a tamzaw in zan in thungen uh ahihmanin Pasian in Radio leh TV etna ding hun nei het lo hi. Pasian pen a beng-am mahmah ding hi.

– Pasian in muh loh nei lo, zaak loh nei lo hi. Mun khemepuh ah tai kawikawi cihna hi. Buai mahmah ding hi. Tua ahihmanin na ngah loh ding khawng peuh ngengen se dah in, nawngkai sak se dah in.

– Pasian in tapa Zeisu nei hi. Zeisu in a hamsa khempeuh sem hi. Tui tunga pai cih khong, na lamdang bawl cih khong pen Zeisu nasep hi. Tua banah ama thu umlote tungah thu gengen ahihmanin mipi in cimtaak uh a, singlamteh tungah khailum ziau uh hi. Ahizongin Zeisu pen mi lungsim hoih mahmah khat na hi citciat se hi. A pa khiangah “Pa aw a mawhna uh ka maisak diam” acih leh Pasian in “OK” na ci ziau hi.

– Pasian in Zeisu gimthuak teng amuh ciangin hehpih huaisa hi. Vantungah amah tawh a om khawm tawntung dingin sam ziau hi. Zeisu in vantungah Pasian nasep huh a, mihingte thungetna ngaihpih hi. Zeisu in vantungah Secretary sem cihna hi. Ama sep theihte ah a pa Pasian buaisak se lo in sem hi. Thupi semsem hi.

– Na ut hunhun thungen thei ta hi teh. Bang hang hiam cileh Full-time a ih thunget teng hong ngaihsak ding leh hong pia ding Zeisu om ta hi.

– Nipini (Sunday) sim kikhop ding mangngilh kei in. Tua in Pasian lungkim sak mahmah hi. Pasian bek mah na lungkim sak ding ahihi. Mi dangte na lungkim sak zo kei zong phamawh kei!

– Pasian pen mun khempeuh ah om ahihmanin ka lungnuam hi. Khuazing sungah zong ka lau nawn kei a, tuipeek ding zong ka lau nawn kei hi. Kei bekin zong ka daileng ngam ta hi.

– Pasian in na khempeuh ong sepsak den dingin tuat ken. Hi leitungah hong koih ahihmanin nang zong na sep kul hi. A ut hun ciang Pasian in hong latokik ziau ding hi.

By Danny Dutton
Chula Vista
Lailet – Francis Lamthang (Zomi Quavadis)