Khinkhai huai thu ~ Bob Tuangpi

Khinkhai huai thu ~ Bob Tuangpi

2008 kum piingpei huihpi ( Nargis Cyclone) in anawkna Irrawaddy Delta Region ah misi pen 150,000 kiim hi-in tua sangin zongh tamzaw thei kha ding hi. 2014 gambup milip simna ah Chin State buppi milip 500,000 pha liamliam hi. Tua sung ah Tedim leh Tonzang huam sung milip vekpi 120,000 cing dektak bek hi. Kawlmi aciik mahmah leh atamna Monywa township sung bebek ah mimal 370,000 val hi. Yangon Region, Thaketa township sung bebek milip 1,000,000 ( One million) val hi. Myanmar gambup milip simna 2014 ah gambup milip 54,000,000 ( 54 Million) pha hi.

Midangte in Chin ci aa hong theih himhim uh Kawlgam bup ah kithehthaang teng kigawm leh 1,000,000 ( One million) val deuh bek hiding hi. Zomi ci-in kampheen kullo, mintap nei Kawlgambup mun khempeuh aa om teng kigawm leh 200,000 kicingzo phalo ding hi. Rakhine State ah minamdang kihello Rakhine kampau bebek 2,000,000 ( Two million) bang pha uhhi.

Tulaitak UWSP/Wa ukna nuai ah om Wa Special Administered Region ah Township (6) om-in milip 600,000 kiim pha hi. Shan kici Tai minam bebek Kawlgam sung ah 6,000,000 ( 6 million) val ding hi. Tualo Shan State sung ah om Ta’ang/Palaung minam, Pa-oh minam cihte atawm pen mimal milip 600,000 – 1,000,000 ( Thein 6 pan thein 10 kikal) pha uhhi. Tualo Shan State sungah minam citawm zawdeuh aa kiseh Lahu minam, Einthar, Danu, Taungyone, Arkhar cihte nangawn atawm pen mimal 100,000 – 300,000 kikal pha ding uhhi.

Amau leh amau Jingphaw kici-in asuakta Jingphaw Wunpawng gam phutkhiat asawm Kachin te zongh 2,000,000 ( Over two million) pha uhhi. Tualo Kachin State sung tualsuak minam Jingphaw sung a lut nuamlo Rawang leh Lishu minamte nangawn atawm pen mimal 150,000 valta bang pha ding uhhi.Ei pau tawh Kawlte ih cih Bamar/Myanmar kicite milip mimal bebek atawm pen gambup ah 30,000,000 val ( Over thirty million) pha ding kiseh hi.

Tua hi a, leitung mun tuamtuam ah khuahunsiatna/natural diaster( huihpi nung, tuikhang, memcim, zinliinna)hangin sihkhat, lomkhat asizah milip zah zongh aphazolo eimite in lungsim lawpna ( Emotional feeling) masakna tawh pumdiangawp loh ding thupi mahmah ban ah hih gamtatana/thupiangte’nungah bang lawhsapna, dongtuahnate leh gamvai, minam vai leh ih nisim nuntak khuasaknate ah bangzah ciang, bang hun dong hong sukha ding hiam cih khinkhai tuahna ( Reasoning) ih neih mahmah ding kisam ding hi.

Tualsung mipi ciat bulphuh-in galkapte langdona siksan tuamtuam ahi CDF, PDF te in gamvai ah koitan hong tunpih mah ding hiam ( Political solution) cih kantel huai leh pilvanghuai mahmah ding hi. Ei nautangte’upmawh bang zenzenin tutung gamvai buaina hong veng hetlo ding hi, cih kilang hi.

Alangkhat leuleu pan tutung buaina pen minam minpua thautawi kipawlnate in gamvai leh minam vai ah kihona/kitawitehna ( Political bargaining power)alemtang nading gamtatatna cihte ahih leh poimawh bilbel ding hi.Mailam saupi ( Long term policy) ading tutung khuahun ah kibualsiam ding leh hih tuihual/meileeng tungah atuansiam ding uh bel thupi mahmah kha ding hi.

Koimun koigam hita leh simmawh netniamna leh bawlsiatna a om naak leh lehdokikna ( Revolution) phuulkhia angeina hi a, tua bang eisangin azah tampi athahat ngalkhawhang ( Giant) abang leh uknaza ngah nading ahih naak leh mulkimna ciziatna neilote tawh kitalsikna ah ih pilvang mahmah keh kiphunggamh/kizunglot dinmun kitung thei ding ahih manin, lunggam gamphut dan ih pelh ding kisam ding hi.

Leitung gam tuamtuam gamvai buainate ih et tak ciangin ukna thuneihna angah nading uh ahanciam tuak pawl/group tuamtuamte’hangin akizunglot leh hingmanlawh minam citawmte leh gammi tampi om-in tuate’hangin zongh gamvai ah kikhelna omtuanlo, tangthu tampi om veve hi.

Hibang dan hithei mawk ahih teh ei minam citawmte khat ih luang ih ban amawk bei simin mimal citam (Gtna, Kawlmite) khong atul tul, athenthen-in asih tawh kikim pan ding hi. Ahizongin, nisimin gammi tampitak in gam ading cihna tawh atultul, athenthen in anuntakna uh abeilawh zenzen hang gamvai ah kilemna leh lawhcinna ngah pah ding ( Political result) hituan peuh mah lo hi, cih leitung gam tuamtuamte’ tungtaang pan thupil tampi kimukhia khin hi. Bob Tuangpi (001752021)