I Topa’ Nu Mary tawh tukhawm dih ni ~ Rev. Zam Khat Kham

I Topa’ Nu Mary tawh tukhawm dih ni ~ Rev. Zam Khat Kham

A kha gukna ciangin Pasian in Galilee a khua khat ahi Nazareth a David suan Joseph tawh a kiteng dinga kidongsa Mary kiang ah Gabriel a sawl hi. Vantungmi ama’ kiang ah hong pai-in, “Greetings, Pasian’ angvaanna/maipha a ngah nu aw! Topa nang tawh hong omkhawm hen” a ci hi.

Mary in ama’ kammalte a zak ciangin lungmanga, bangci bang kihopihna hi mawk hiam ci-in lamdang a sa hi. Ahih hangin vantungmi in, “Mary aw, lau kei in, Pasian’ angvaanna/maipha na ngah khin zo hi. Nau na paai dinga tapa khat na nei ding hi, a min Jesuh na phuak ding hi. Amah lian dinga Sangpen Pasian’ Tapa kici ding hi. Topa Pasian in a pa David kumpi tokhom amah pia dinga, Jacob innkuan tung ah a tawntungin a mang ding hi; a kumpi gam in bei hun nei ngei lo ding hi,” a ci hi.

Mary in, “Kei nungak siangtho/bit khat ka hih teh hih thute bangci bangin piang thei ding ahi hiam?” a ci hi.

Vantungmi in, “Nang tung ah Khasiangtho hong tung dinga, Sangpen Pa’ vangliatna in nang hong sung (overshadow) ding hi. Tua ahih manin na sung pana piang ding a siangtho nau pen Pasian’ Tapa kici ding hi. Ta nei thei lo a kigen na kitanaupih Elizabeth nangawn in a tek a guai nungin naupaai-a tu-in kha guk pha khin ta hi. Pasian in hih theih loh nei lo hi” ci-in dawngkik hi.

Mary in, “Topa’ nasemnu ka hi hi, na gen bangin piang ta hen” ci-in a dawngkik hi. Tua ciangin vantungmi in a paisan hi. (Luke 1:26-38)

“Vangtungmi” (angel) a cih ciangin a taktakin “sawltak” (messenger) a cihna ahi hi. Khatveivei thupuak dingin vantungmite khatguak kisawl thei hi. Khatveivei lah nihta-in kisawl thei gige hi. A hun dangte ah lah a honpi banga a kisawlna mun zong na om kawikawi hi. Khatveivei amaute’ kilatna pen lamdangsuah deuh hi. Khatveivei lah kuama’n phawkkha khol lo-in mai ziau thei bilbel hi. Mun tampi ah a min a puam nangawn uh pulaak lo uh hi. Laisiangtho sung ah vangtungmi nih bel a min ngiat-a kilo om hi. Michael, Isreal mite a cing a hu vangtungmi hi. Gabriel, thupuak-a kisawl zelzel vantungmi hi.

Gabriel pen “Pasian’ galhang pa” hi a, Pasian’ sawlna tawh gal bangzahvei do-in gualzo khin ding, cih kiseh thei lo hi. Tu’n bel, galdo ding hi lo a, leitung mihing tate in, a ngak lam uh a thei lote nangawn in, a khang a khanga a ngak uh “lungdamna thu” a tangko dingin kisawl hi.

Pasian in Eden huan kongpi a khak ciangin, i pi i pu masate in a pumpi tung vua a silh uh savun puan bek tawh hawlkhiatin na om uh hi. Pasian’ guatsa nik leh puante hi. A maizumna uh a kisel theih nadingin khuaphawk het lo-a om hithiat gan tanote kigo-a sisan kiluangsak, mawhnei mi masate a vun uh kisilhsak hi.

Tua savun puante tawh a kikhui khawm khat om leh kilawm hi. Pasian’ kamciam hi. Honpa, Tanpa hong pai ding cih, kamciam hi.

A khang a khangin tua Honpa’ thu tawmtawmin, damdamin kipulaak hi. Amasa-in Abraham tung ah— ama’ suan leh khak sung panin Honpa hong piang dinga leitung mi khempeuh in thupha ngahlawh ding hi, cih kamciam! Kum 1000 khit ciangin David kici kumpi khat tung ah a sung pan-a piang a suan a khakte sung panin kumpi khat piang dinga ama’ kumpi tokhom tung ah tu ding hi, cih kamciam hi. Kamsang khat khit kamsang khat, kammal khat khiat kammal khat, kilaakna khat khit kilaakna khat, lim khat khit lim khat, hih lai ah pawlkhat, hua lai pawlkhat, a pianzia ding kitel semsem leh kilawm hi.

“Immanuel.” “Bethlehem aw, nang’ sung panin ukpa khat piang ding hi.” “Ama’ min Lamdang Thulakpa, Vanglian Pasian, Tawntung Pa, Nopsakna Kumpi kici ding hi.”

Ahi zongin kum 400 sung Honpa leh ama’ hong pai nading thu kigen nawn peuhmah lo mawk hi. Daicip dide hi. Vantung pan lengla zong om lo, thupuak zong om lo, kilaakna thak mahmah zong om nawn lo hi.

Ahi zongin tu-in vantungmi khat hong kisawl ta hi. Daicip suak lo hi. Israel gam sunga a siangthopen khuapi Jerusalem ah hong pai hi. Mun siangtho penpen ahi Biakinnpi sung ah hong lut hi. Misiangtho pente laka khat ahi siampi sem Zechariah’ kiang ah hong pai hi. Kum 400 sung a daicip tawh a kibang vantung daicip nawn lo hi.

Zechariah in Biakinnpi sung ah siampi nasep a sep laitak, paknamtui gimnamtui a hal laitak ahi hi. Vantungmi khat hong kilang vat hi. Amah patau-in “lau hi,” ci hi. Vantungmi in a tuaci ding sa kei leh kilawm hi.

“Zechariah aw, lau kei in; na thungetna hong kidawng khin zo hi. Na zi Elizabeth in tapa khat nei dinga, a min John na phuak ding hi. Na lungdamna leh na lungnopna hi dinga, ama’ suahna hangin mi tampite kipaak ding uh hi, banghang hiam cih leh amah Topa’ mai mi thupi a suak ding hi. Zu ahi zongin ki-umm limlim dawntheih khatpeuh ahi zongin a nei kei dinga, a suah tunga kipanin Khasiangtho tawh kidim ding hi. Israel mi tampite a Topa a Pasian’ kiang uh ah a kiheiikiksak ding hi. Elijah’ kha leh vangliatna tawh Topa’ mai ah pai khol dinga, pate’ lungtang tate’ lam ah ahi zongin thumang lote’ lungtang thumaanna pilna lam ah ahi zongin a heii ding hi—Topa adingin a kigingkhol mipawlte a suaksak ding hi” ci-in Gabirel in gen hi.

Zechariah adingin hamphathuai mah si maw! Tapa nei-in “pa” khat suak ding cih bek hi lo a, tua a tapa pen Topa’ thu a tangkopa (herald) suak ding, ci sawnsawn hi. I Topa hong pai ciangin mite a lungsim uh a kiginkholh theih nadinga tangkopa hi ding hi.

Ahi zongin banghang ahi mawk tam, Israel gam sung buppi-a a biakna-mi penpen khat hi mah ta leh, vantungmi khat in hih thute a gen pen ama’ adingin kicing zo lo hi leh kilawm! “Bangci bangin hih thu piang thei mawk ding ahi hiam? Kei lah tek ta inga, ka zi zong guai ta hi” ci mawk hi. Teci khatpeuh deihbeh hi leh kilawm. Lim khatpeuh deih lai hi leh kilawm. A “thu” bek hi lo-in a khamuan theih nading banghiamkhat kisamsa lai hi leh kilawm!

Tua pen Gabriel in “up lohna” ci lianmawk hi. “Kei, Pasian omna mun-a ding pa Gabriel ka hi a, hih lungdamna thu a pulaak dingin hong kisawl hi. Ka kammalte um lo na hih manin hih thu a hun a tun ciangin a a pian takpi mateng na daicip dinga na pau thei kei ding hi” ci hiaumawk hi.

A up lohna hangin Zechariah pau thei lo-in om lian hi. Vantung pan-a tua thupuak teci pang kha lo hi. Vantung a daihcip ngei-in kha 9 sung daicip kik hiau hi.

Vantung pan Pasian’ thu hong tung leuleu! Tutung bel khua khempeuh laka siangthopen Jerusalem ah hong tung lo hi. Khua mawkmawk taktak khat ahi Nazareth hi bilbel hi. Vantungmi bel Gabriel mah hi. Ahi zongin tutung bel vantung pana thupuak pen siampi khat tung ah hong tung nawn lo a, nungakno khat tung ah hong tung hi. Biakna nasem khat tung ah hi lo, numei lungsim niam hithiat khat tung ah hong tung hi. Tua nu’ min “Mary” kici hi.

“Greetings! Pasian’ angvaanna/maipha a ngah nu aw! Topa nang tawh om khawm hi” ci-in hopih hi.

Zechariah a patauh, a lau bang hi lo-in Mary in vantungmi a muh ciangin lau lo hi. Ahih hang, vantungmi’ hopihna lamdangsa hi. Nazareth khua-a teng numei mawkmawk khat hopih nadingin a kammalte thupi lua hi. Banghang-a vantungmi hong pai ahi tam? Banghangin hih bang maipha ngah kha ka hi tam? Topa kei tawh hong omkhop nadingin bang “sihna liim guam sung” nawkin ka pai a kul zen tam? Ngaihsutna tampi nei hi.

Lungmang pian, cih a muh ciangin vantungmi in Mary’ kiang ah: “Mary aw, lau kei in, Pasian’ maipha/angvanna nangah khin zo hi. Nau na paai dinga tapa khat na nei ding hi, a min Jesuh na phuak ding hi. Amah lian dinga Sangbel Pasian’ Tapa kici ding hi. Topa Pasian in a pa David’ kumpi tokhom amah pia dinga Jocob innkuan tung ah a tawntungin a mang ding hi; ama’ kumpi gam in bei hun nei ngei lo ding hi” ci-in na khamuan hi.

Tua bang thu kigen Mary in lamdangsa lua mahmah hi. Damdam-in a kam hong ka a, “Kei pasal tawh a lumkhawm ngei lo nungak siangtho ka hih teh hih thute bangci banga piang thei mawk ding ahi hiam?” ci-in dong khiankhian hi. Tua bang thu piang thei peuhmah ding ahi hiam? a ci hi lo hi. Bangci banga piang thei ding, cih a lungkham hi bek hi. Tua nalamdang (miracle) a um lo hi lo a, tua nalamdang bangci banga piang thei ding (the mechanics of the miracle), cih a lungkham hi bek hi. Vantungmi Gabriel’ kammalte muanglah zenzen lo hi. Bangci banga piang ding, cih a ngaihsun zo lo hi bek hi. Gabriel in:

“Nang tung ah Khasiangtho hong tung dinga, Sangpen Pa’ vangliatna in nang hong sung (overshadow) ding hi. Tua ahih manin na sung pana piang ding a siangtho pa pen Pasian’ Tapa kici ding hi. Ta nei thei lo a kigen na kitanaupih Elizabeth nangawn in a tek a guai nungin naupai-a tu-in kha guk pha khin ta hi. Pasian in hih theih loh nei lo hi” ci-in dawngkik lian hi.

Ahi zongin Elizabeth in naupai cih zenzen pen a thu tuampi khat hi. A tek a guai nung ahih hangin pasal nei hi a, kum tampi a pasal tawh a omkhawm mi ahi hi. Mary leuleu bel, “a kidongsa” ahih teii hangin nungak siangtho/bit hi zenzen hi. Zan deuh mah-a kidong hi sawnsawn hi. A dawnkikna i muh teh lamdang lua mahmah hi: “Topa’ nasemnu ka hi hi, na gen bangin piang ta hen” ci ngeumawk hi.

Pasian’ deihna leh Pasian’ gelna bangbang mang dingin Mary in a khentat ciangin a mai ah a tuah ding thuhaksapi tampi tawh khentat khawm hi, kici thei hi. A kidongsa numei khat a pasal lo tawh a gai zenzen leh khuasung mite in suanga a denlup ding uh Judah mite’ ngeina ahih lam zong Mary in thei gige hi. A hamphat mahmah leh mindai mahmah, zumhuai mahmah ding, a hamsiat leh suangin kidenglum ding, cih theihsa hi. Ahih hangin Mary in Pasian muang hi.

Tua khua, tua venga numeite’ tuitawina tuikhuk ah a sawt lo-in Mary’ zawlgaina thu kigen pah ding hi. Nupi khat bangin, “Bangbang bangbang na gen zongun mi khatpeuh bel a hihna taktak hong kilangkhia lel a ke!” ci zen ding hi. Mary a hehpih pian nungak khat bangin, “ Hmm. Nazareth bel gamdang sumbawlte in lah hong nawksuk hong nawkto uh a, Roman galkapte lah a omna khua hi mawka maw” ci phei kha ding hi.

Mary’ thu hong kitheithaang dinga, mite in zahkona tawh a etzia ding mahmah uh kimu thei hi. A nehpiksan zia ding uh, a zak lohna bek hi lo a, a zak hiamhiamna ah a gensiat zia dingte uh kiseh thei hi.

“Vantungmi khat kilang ci ahia?” “Kua’ cih e? Ama’ gen maw?” “Bangci e? Khasiangtho e? Mary in ci maw? Imm. Nang um maw?” Mary pen Khasiangtho in a gaisak hi, cih thu kua peuhmah in um mawk ding hiam? Joseph in maw? A tek dingte in maw? Rabbi khatpeuh in maw? Kua’n?

Kuamah mahmah in um-in um kei mawk ing. Ahih hang, kuama’n a um kei zongin Mary in vantungmi Gabriel’ tung pan-a a zak bangin Pasian’ kamal um hi.

Mary’ upna bel upna kici lakah a lamdang mahmah upna hi. A khauh mahmah upna hi. Khentat lianin Topa’ thu mang pah hi. Bangbang haksatna tuak phial ding hi ta leh, Pasian’ deihna ah ki-ap (submit) hi. A suplawh zongin, a bailawh zongin, a minsiatlawh zongin, a ngaih mahmah a lawmpa a tanlawh zongin, Pasian’ deihna na mang hi.

A nuntakna nangawn a tanlawh thei lua ding hi lai hi. Tua “a tuaci zongin” cihteng khempeuh mah-in i Topa’ pianna nu dingin Mary kilawmsak hi mai ding hi.

Thungetna

Topa aw, amah bel mi lamdang taktak mah hi mawk mah ei, na nu e. Pasian’ maipha ngah a, thupha ngah numei hi taktak hi. “A siangtho Maria, Vanglian Pasian’ nu aw” a kicih ka zak simin zak ngeingei biakpiakna kammal a za bang hi lo-in, tua bang mi a suah theih nading ama’ upna leh a khentatna hong phawksak den in. Pasian’ Nu! Tua bang dingin Mary longal kua dang peuhmah hi thei mawk ding hiam?

Pasian’ maipha ngah mah ve’n, a tavuan zong lian lua. Honpa a sung pah paai bek lo-in siatna khempeuh pan hu-in kem-a, pantah-in khansuah lailai!

Mary’ tung pan ka sin ding uh tam lua hi, Topa aw. “Kei na nasemnu/nasempa hi’ng. Na gen bangin piang ta hen” hong ci thei den hi le ung bangzahin na lung a dam zen tam!

Tua bang ci thei den hi le ung, ka ngaihsutna uh, ka kammalte uh, ka gamtatte uh bangzah-in a kilamdang zen tam! Ka nuntakna uh bangzah-in a kilamdang zen tam maw, Topa aw.

“Na nasemnu/nasempa hi’ng.” Cih ding baih napi-in, nuntakpih ding haksa lua hi. Bangbang piang ta leh ka nuntakna uh ah nangma’ gelnate kong man den nading uh, “Na nasemnu/nasempa hi’ng” kong cih theih nadingun hong huh in. Na gen bangin piang ta hen,”- a cih bel baih mah ei, ka cih takpi mah uh ahi hiam? Ci takpi-in nuntakpih takpi ding ka lunggulh lua uh hi, hong huh in, Topa aw. (Ken Gire’ gelh Moments With the Savior kici laibu ka simna pan-a ka ngaihsutnate hi. Rev. Zam Khat Kham)